විකසිත වී පිපෙන්නට වෙර දරන මල් කැකුළුවන් ගුණවත් සත්පුරුෂ දරු පිරිසක් දැයට දායාද කිරීමේ අරමුණ ඇතිව දෙල්ගොඩ, දෙමාලගම නම් සොදුරු ගම්පියසෙහි 2018.02.28 දින මහමෙව්නාව බෞද්ධ විද්‍යාලය  ආරම්භ වූයේ මහමෙව්නාව භාවනා අසපු සංචිතයේ නිර්මාතෘවර සහ ප්‍රධාන අනුශාසක ධුරන්ධර අපගේ ගුරුදේවෝත්තම අතිපූජනීය කිරිබත්ගොඩ ඤණානන්ද ස්වාමින්වහන්සේගේ පූර්ණ අනුශාසනා සහ ආශිර්වාදය ලබමින් ය.

      මැලේසියාවේ ථේරවාද බෞද්ධ සැදැහැවතුන්ගේ උපකාරයෙන් ඉදිවුන සියලු පහසුකම් සහිත ගොඩනැගිලි සංකීර්ණයකින් සමන්විත මනරම් භූමිභාගය විදුහල ආරම්භ කිරීම සඳහා පරිත්‍යාග කරනු ලැබුවේ, මැලේසියාවේ ප්‍රධාන අධිකරණ සංඝනායක ධුරන්ධර ක්වාලාලම්පූර් නුවර සෙන්තුල් බෞද්ධ විහාරස්ථානයේ විහාරාධිපති, ථෙරවාදී බෞද්ධ කවුන්සිලයේ ගරු අනුශාසක අතිපූජනීය බූටෑවත්තේ සරණංකර නාහිමිපාණන් වහන්සේ විසිනි.

    අප විද්‍යාලය 1960 අංක 05 දරණ උපකෘත පාඨශාලා හා අභ්‍යාස විද්‍යාල (විශේෂ විධිවිධාන) පනත, 1961 අංක 08 දරණ උපකෘත පාඨශාලා හා අභ්‍යාස විද්‍යාල (විශේෂ විධිවිධාන) පනත සහ 1981 අංක 65 දරණ උපකෘත පාඨශාලා හා අභ්‍යාස විද්‍යාල (විශේෂ විධිවිධාන) සංශෝධන පනත යටතේ ලියාපදිංචි රජයේ අනුමත පෞද්ගලික පාසලකි.

      සියලු පහසුකම් සහිතව නිසල පරිසරයක පිහිටා ඇති, දරුවන් 38 දෙනෙකු ගෙන් සහ ගුරුවරු 5 දෙනෙකු ගෙන් ආරම්භ වූ අප විද්‍යාලය දිවයිනේ ප්‍රවීණ අධ්‍යාපනඥයෙකු වන හාපිටිගම ජාතික අධ්‍යාපන විද්‍යාපීඨයේ ජ්‍යේෂ්ඨ කථිකාචාර්ය ධුරය හෙබවූ අධ්‍යාපන දර්ශනපති ජී. ආර්. සී. කේ. ගම්ලත් මහතා විදුහල්පති ධූරය හොබවන අතර මේවන විට ප්‍රවීන ගුරුවරුන් 21 දෙනෙකුගෙන් යුතු ගුරු මණ්ඩලයකින්ද විශාල සිසු පිරිසකගෙන් ද සෙසු කටයුතු පූර්ණය කරන දක්ෂ අනධ්‍යන කාර්ය මණ්ඩලයකින්ද සමන්විත වේ.

     නවීන  පහසුකම් සහිත පන්තිකාමර, විද්‍යාගාර, පරිගණකාගාර මෙන්ම චිත්‍ර, නැටුම් හා නාට්‍යකරණය, පෙරදිග හා අපරදිග සංගීතය ආදී විශයන් සදහා අවශ්‍ය පහසුකම් වලින්ද  නවීන පහසුකම් වලින් සමන්විත භෝජනාගාරයක් සහ නේවාසිකාගාරයක් ද ආරම්භයේ පටන් ම විදුහල සතු විය.

      ගුණධර්මයෙන් සුපෝෂිත දරු පරපුරක් දැයට දායාද කරමින් දිනෙන් දිනම තම අරමුණු සාක්ෂාත් කරගැනීම උදෙසා අභිමානවත් ගමනක යෙදෙන මහමෙව්නා බොදු විදුහල් මෑණීතොමෝ දියුණුවෙන් දියුණුවට පත් වෙත්වා යි මෙත් සිතින් සෙත් පතමි…!